Bloggur Greifans

Fortune dagsins
I would rather live in a world where my life is surrounded by mystery than live in a world so small that my mind could comprehend it.
-- Harry Emerson Fosdick

Helstu tíðindi
Við Elma skelltum okkur á Norah Jones tónleikana á sunnudaginn var og er óhætt að segja að þeir hafi fyllilega verið peninganna virði. Takk takk FL fyrir að styrkja þessa uppákomu.



Á hinn bóginn á FL sök á því að tónleikarnir voru sérstaklega eftirminnilegir ekki vegna tónlistarinnar heldur vegna framkomu FL í garð tónlistarmannana sem og annarra gesta sem ásamt okkur sátu. Málið var eftirfarandi:

kl 19:55
Við Elma erum komin inn og fáum okkur sæti, ásamt mörgum öðrum gestum, eins og kurteisu fólki sæmir. Erum staðsett fyrir miðju á 14. bekk en fyrstu 10 bekkirnir ásamt nokkrum fyrir aftan okkur eru svo gott sem tómir! Hvernig skyldi standa á þessu? Klikkaði eitthvað í miðasölunni?

kl:20:00 - 20:40 (Skv auglýsingu áttu tónleikar að hefjast 20:00)
Tónleikarnir hefjast með því að Norah syngur ásamt upphitunarforsprakkanum tvö lög áður en upphitunarbandið byrjar í alvöru að kynda salinn. Þetta eru mjög góðir tónlistarmenn og fara þeir á flug í mögnuðu gítaratriði þar sem einn maður er eins og heil hljómsveit. Enn eru sætin auð.

kl 20:40
Upphitunarhljómsveitin hefur lokið hlutverki sínu og er salurinn kominn í góða stemnningu en þá gerist það!
Ljósin kvikna og inn streymir þotuliðið sem hefur verið í kokteilpartíi í næsta hliðarherbergi. Þarna má sjá: Kára Stef, Bjarna Ármanns, Gísla Martein, Þórð Friðjóns, Svöfu Grönfeld, Guðfinnu Bjarna, Ingólf Helga, Evu Maríu, Frosta sexy, marga starfsmenn hjá Straumi, Kaupþingi, Lansa og Glitni svo einhverjir séu nefndir.
Salurinn kólnar niður fyrir frostmark við þessa truflun og öll vinna upphitunarbandsins til einskis.

Þetta var hið ægilegasta klúður eins og hefur varla farið fram hjá neinum sem fylgist með því sem stendur í fjölmiðlum þessa Eyríkis. Talsmaður FL, sem btw var á tónleikunum frá 20:40, hefur reynt að hvítþvo hendur fyrirtækisins af þessari smekkleysu og segir boðsgestina ekki hafa verið hlekkjaða fasta við súlur í forpartíinu og því verið frjálst að fara á tónleikana hvenær sem þá langaði til. Spurningin er hins vegar:

1. Var það ekki FL sem hélt umrætt forpartí?
2. Var það þá ekki FL sem stýrði ferðinni og vísaði boðsgestum í salinn fyrst kl 20:40?
3. Er þetta boðlegt í ljósi þess að FL styrkti tónleikana?

Vissulega ættu hinu fínu gestir að hafa gert sér fulla grein fyrir hvað var í gangi en þeir voru jú gestir í boði FL og sem slíkir hafa þeir að sjálfsögðu sýnt þá lágmarkskurteisi að vera á staðnum þar til augljóst merki væri gefið um að tími væri kominn til að fara inn í tónleikasalinn.