Bloggur Greifans

Fortune dagsins
I used up all my sick days, so I'm calling in dead.
-- Höf. óþekktur

Heyrst hefur að sumir "nota" alltaf þá tvo veikindadaga sem þeir hafa í mánuði. Ætli þeir spái nokkuð í hvað gerist ef þeir verða skyndilega raunverulega veikir?


Helstu tíðindi
Ég hef síður en svo verið iðinn við bloggið síðustu daga og er það gott merki um að ég hafi nóg að gera þegar ég hef ekki einu sinni tíma til að slá nokkrar nótur á píanóið. Því ætti ekki að koma á óvart að þessi færsla verður í lengri kantinum og best að segja frá hlutum í krónologískri röð.

Fimmtudagur:
Við hjónin erum aftur byrjuð að stunda dansinn. Fyrst vorum við 2 misseri veturinn 1999-2000, síðan 2 misseri veturinn 2003-2004 og nú aftur veturinn 2006-2007. Talnaglöggir menn ættu að vera búnir að sjá að ástundun okkar í dansinum má næstum lýsa með mismunarunu sem gefin er með eftirfarandi formúlu: a = 2000 og a[n] = a[n-1] + 3.

Við hófum leikinn í hópi sem ber heitið "Framhald 2" en sáum fljótt að við kunnum mun meir en verið var að æfa og tókum því strax þá ákvörðun að uppfæra okkur í "Framhald 4". Breytingin hefur jafnframt þann kost að hinn salurinn er miklu breiðari sem er sérstaklega gott þegar ballroom dansarnir eru annars vegar.

Laugardagur:
Eitt af áramótaheitum mínum var að elda meira í ár heldur en 2006 en einnig höfum við hjónin ákveðið að vera myndarlegri við að bjóða vinum og fjölskyldumeðlimum í mat... listinn er orðinn ansi langur og veit ég satt að segja ekki hvort að árið endist til að borga skuldina. Nú var röðin komin að Hákarlinum og Marín og hafði ég ákveðið að nýta skyldi kunnáttuna frá Sushinámskeiðinu sem Elma sendi mig á fyrir jól og bjóða turtildúfunum í heimalagað eðalsushi.

Sushi er sko ekkert grín, ha? sjóða hrísgrjón og skella hráum fiski á, hvaða mál er það? Nei þetta er ekki alveg svo einfalt því t.d. þarf fyrst að skola hrísgrjónin aftur og aftur og aftur og aftur... o.s.frv. Undir engum kringumstæðum skal vanmeta mikilvægi þess að skola grjónin almennilega og ég er ekki að ljúga þegar ég segi að á fyrsta ári hins 3ja ára sushikokka námskeiðs í Japan gerir neminn ekkert annað en að skola sushigrjón!! Hugsið ykkur.

Sem sagt þá byrjaði ég á því að skola og skola í heilan klukkutíma.
Síðan sjóða með nákvæmlega réttu vatnsmagni í nákvæmlega réttan fjölda mínútna.
Að því búnu setja í skál, kæla aðeins og setja hrísgrjónaedikblönduna yfir.
Loks losa um klumpana með sleif og þá eru hrísgrjónin tilbúin til notkunar.

Við Dóri, með hjálp frá dömunum, bjuggum til nokkrar maki-rúllur með laxi eða túnfiski og slatta af nigiri-bitum með laxi eða túnfiski. Þetta rann alveg einkar vel niður með japönskum eðalbjór.