Bloggur Greifans

Fortune dagsins
Examinations are formidable even to the best prepared, for
even the greatest fool may ask more than the wisest man can answer.
-- C.C. Colton

Hef þetta bak við eyrun þegar ég sem vorprófið.


Helstu tíðindi
Fengum sænskan sérfræðing hingað til landsins til að halda kynningu um væntanlegar breytingar í viðskiptakerfinu um helgina. Eins og góðum gestgjöfum sæmir buðum við honum út að borða og var ákveðið að prufukeyra Perluna, aðallega vegna útsýnisins. Ég hafði heyrt margt misjafnt um matinn en það voru greinilega hinar verstu lygasögur því maturinn var frábær: Hörpudiskur og tígrisrækjur í forrétt, önd í aðalrétt og prýðisgott léttvín með þessu. Eini mínusinn var að þjónustan var keyrð áfram í lága drifinu sem gerði það að verkum að ég var þarna "fastur" frá 19-23:15. Ekkert slappað af í faðmi fjölskyldunnar þetta kvöldið.

Smá fréttir af drengnum: Skjöldur Orri fór á sína aðra knattspyrnuæfingu með 8. flokki Þróttar á laugardaginn með afa sínum og var það víst skemmtun hin bezta. Lítið fer nú fyrir fallegum leiktilþrifum hjá hópnum því þetta er meir eins og samansafn af óvitum sem hafa varla hugmynd um til hvers er ætlast af þeim í leiknum en æfingin skapar meistarann eins og sagt er og betra er að byrja ungur. Til gamans skal þess getið að ég æfði á tímabili með 5. flokki Þróttar akkúrat í sama leikfimishúsinu en það er önnur... og frekar stutt saga.

Sá stutti heldur stöðugt áfram að koma á óvart og núna í byggingarfærni. Mál er þannig með vexti að í tilefni þess hve vel honum gekk í síðasta píanótíma gáfum við honum sæmilegt legó í verðlaun (fékk á slikk á útsölu Leikbæjar). Minn maður settist niður, tók leiðbeiningarnar og setti saman legóið alveg án nokkurrar aðstoðar. Ég verð að viðurkenna að þetta kom mér algjörlega í opna skjöldu og er greinilegt að ég þarf að finna gamla legóið mitt aftur og leyfa honum að spreyta sig.

Að lokum: Glæsilegur sigur hjá Arsenal í gær!


MR krókurinn
Eini mínusinn við kennsluna er að fara yfir próf og verkefni. Ef ég ætti sand af seðlum myndi ég ráða e-n háskólanema í það verkefni :+) Eina ráðið er að hafa eitthvað nógu hresst á i-podinum og það lag sem hefur reynst hvað best er:
Smack my bitch up með Prodigy

Nema hvað!